Labadot jauna, Ituna izenpetzean, bere herriko bideak bizikletentzat egokitzera engaiatu da. Alta, bere agintaldia hasten du Kolegioko zubian, bizikletentzat egina zen egokitze baten kentzeko xedearekin: 3 urteko atzeratze bat da, autoendako bi norabide dituen bide bati buruz. Xede hori, legearen errespetu aldetik susmagarria dena, engaiamendu ekologikoen eta historiaren norabidearen kontra doa! Bizik espero du Herriko Etxe hori ez dela tematuko iraganeko munduko proiektu hortan.
Nahiz eta herriko mugikortasunaren auzitan ematea ez zen batere aipatua Herriko etxean gehiengoa duen “herritarren batasuna” zerrendaren programan, “kontsulta herrikoi” bat plantan emana izan da urte bukaerako besten karietara: “kolegioko zubian autoendako norabide bikoitzaren itzuleraren” alde edo kontra bozkatzea. Bozkatzeak bukatu ondoren atera den 2021eko urtarrilaren bukaerako herriko kazetan zehaztua da auto eta traktore gidari “mauletarrek” (eta zer kamioi eta autobus gidarien iritziaz?) erakutsi norabide bikoitzaren aldeko nahia. Horrezgain “gogoeta orokor bat eramana izan behar da: oinezkoen, bizikleta bideen eta ibaiaren eskuin bazterreko zubi puntako bidegurutzearen segurtasunaren arloan”. Kontuan hartuz bozkatzeko erabiliak izan diren terminoak, eta aintzinetik ez dela eztabaida publikorik egin, 1341 pertsonek parte hartu dute eta haietarik 1135ek “alde”bozkatu.Aitzineko esaldian zerrendatuak diren alde txarrak eta aitzin ikusiak diren aterabideak ez dira ageri.
Noski 1341 pertsonek parte hartu dute “kontsulta herrikoi” honetan eta gehiengo zabalak autoendako norabide bikoitzaren alde bozkatu du. Baina, kontsulta desmartxa hau okerra da behereko hainbat arrazoinek erakusten duten bezala:
1. Mauletarrentzat atxikia zen (Maulen, zure bizitegiaren karrikako zenbakia eta izena zehaztu behar zinuen). Horrela, inguruko 4 herrietako erabiltzaileak ez dira kontsultatuak izan;
2. Kontsulta egitean, Herriko Etxearen komunikazioa eta bereziki auzapezarena, norabide bikoitza berrezartzeko zuzendua zen. Froga gisa, Mauleko hiri barnean, ezkerreko ibaiertzetik eskuinera joateko egungo gidarien saihesbidea 2 km-koa zela aipatua zen kontsultaren dokumentuan, errealitatean gehienez kilometro bat besterik ez denean;
3. Kontsulta demagogikoa izan da: mauletarrek, batez ere autoa erabiltzen dute, dauden azpiegiturek horretara bultzatzen dituztelako eta mugikortasun alternatiboen erabiltzaileei kuraia kentzen dietelako . Ohiturak hartuak izanez, bistan da autoen statu quo-ak denen oniritzia ukan duela, eta mugikortasunak ez direla sekulan aldatuko ikuspegi honekin.
4. Kontsulta, Mugikortasunen Sindikatua bezalako egitura interesatu edo eskudunekin aitzin hitzartzerik izan gabe, eta, Saltzaileen Batasuna eta hasieratik Maulen gaindi bizikleta bideen bultzatzaile den BIZI Xiberoa bezalako tokiko elkarteen aholkuak galdatu gabe egin da.
Erantzun gabe egon den gutun baten ondotik, azkenean, Bizi Xiberoak elkarrizketa lortu zuen auzapezarekin eta haren hiru axuantekin, joan den Otsailaren 2an. Zoritxarrez, bilkura honek ez zuen emaitza eraikitzailerik ekarri Herriko Etxe berriko ordezkarien aldetik.
Martxoaren 11n, deliberaziorik edo udal araudirik ez zelarik oraino hartua izan, erabiltzaileak harriduraz ohartu ziren, bizikleta bidean norabide bikoitzeko markak ezabatzearekin Kolegioko zubiaren berrantolatzea abiatua zela, bizikletaren erabilera biziki arriskutsua bihurtuz!
Mauleko kolegioko zubian autoendako norabide bikoitza duen zirkulazioaren ezartzearen proiektua historia zentzugabekeria da, eta klima aldaketaren aurkako borrokaren kontra doa. Oraingo herriko etxeak sinaturiko Metamorfosi Ekologikoaren Ituna urratzen du eta Ingurumen Kodearen L. 228-2 artikulua hausten du. Artikulu hori, plantan da duela 25 urte eta LOM legeak berrikitan berretsi du, edozoin bideren aldaketan bizikletentzat antolaketen egitea nahitaezkoa bilakarazten baitu. Proiektu honek Maule hiriguneko zirkulazio lasaiaren bukaera ekarriko luke, diren bizikleta bideei kolpe gaitza emanen lieke eta bizikleten zirkulazioa, baita oinezkoena ere, biziki arriskutsua bilakatuko litaizke.
Bizirendako eta bere tokiko taldearendako, proiektu hau bazterrera utzia izan behar da. Aitzitik, ezinbestekoa da Mauleko bizikleta bideak garatzea, indartzea eta seguruagoak bilakatzea. Aitzineko kargualdian ezarria izan den kolegioko zubiko norabide bakarreko autoen trafikoa, iniziatiba on da. Hiri barnea lasaitzea, biziberritzea eta bide publikoa ibilgailuen, bizikleten eta oinezkoen artean hobeki partekatzeko bidea ematen baitu, Euskal Hirigune Elkargoaren etorkizuneko Hiri Bidaien Planak (PDU) bultzatzen duen bezala.
Oroitarazte gisa, Ipar Euskal Herriko metamorfosi ekologikoaren aldeko ituna:
