Irailaren 25ean, igandez, Bizi! elkarteak bizikletaz ibiltzeko deia luzatzen du Donibane Lohizunen. Helburua: herrian, bizikleta-bide seguruak antolatzeko, asmo handiko plan bat plantan ezartzea galdegiten dugu. Alabainan, hirietako bizikleta-bide eskemaren azken aitzin-txostenak, maiatzaren 23an publikoki aurkeztu denak, den bezala, ez du eskaera honi erantzuten, bere hedaduran, ez eta ere bere epeetan.
Donibane Lohizune, bizikletaren eguneroko erabilpenaren «kontra»? 2022ko otsailean aurkeztu zen Frantziako Bizikleta Erabiltzaileen Federazioaren (FUB) barometroaren ondorioa da. “Maiatza bizikletaz” ekitaldiaren tokiko bertsioa bezalako komunikazio operazioak egin arren, argi da Donibane Lohizune bizikleta antolamendu seguruez ez dela aski hornitua gaur egun.
Nola pentsa testuinguru honetan, biztanleen gehiengoa seguru sentitzen dela bizikleta erabiltzen duelarik, eguneroko joan-jin laburretan? Gogora dezagun euskal kostaldean berotegi-efektuko gasen isurien lehen iturria garraioa dela. Zorrozki murriztu genezake autoaren leku nabarmena gure eguneroko bidaietan (lana, erosketak, etab.) bizikleta antolamendu seguruak sortzen bagenitu.
Alta hori da Donibane Lohizuneko herriko-etxeak azken bi urteetan erakutsi duen anbizioa. Estatuak laguntzen duen Bizikleta eta mugikortasun aktiboen planaren esparru orokorragoan sartzen da. Baina hitzetatik ekintzetara, bada oraino alimaleko hutsunea. Horretaz ohartu da Bizi! maiatzaren 23an, hirietako bizikleta-bide eskemaren aitzin-txostenaren aurkezpenean: antolamenduen promesak gutienera murriztuak dira –eskolen inguruan mugikortasunaren eztitze edo baketzerik ez, adibidez– eta horien obratzea luzatuko da… 2028ra arte! Larrialdi ekologikoak igurikatzen ahal du.
Bizik deitoratzen du Jean-François Irigoyen jaunak, Donibane Lohizuneko auzapezak eta Euskal Herria – Aturri Mugikortasunen Sindikatuaren lehendakariak ere, kar gehiago ezartzen duela hiriaren erdian den Foch guneko aparkalekua defendatzeko, autoendako erreserbatutako 427 lekuekin. Beste garai bateko proiektua, egiazko «autoen xurgagailua», Euskal Herria – Aturri mugikortasunen planaren kontra doa. Izan ere, honek aurreikusten du, 2030erako, autoen erabilera % 70etik % 52ra murriztea. Plangintza horrek gomendatzen du auto-gidariak “ibilgailuak kanpoaldean uztera eta hiri barnera sartzeko modu egokiagoak hartzera» bultzatzea.
Baina Bizi! konbentzitua da sustengu pixka batekin eta herritarren mobilizazioaren bidez, Jean-François Irigoyen jaunak jakinen duela etenik gabeko sare bat eta behar bezain segurua eskaintzen, denek bizikletaz ibiltzeko parada ukan dezaten Donibane Lohizunen hemendik 2025a arte.
Horregatik, Bizik dei egiten die mugikortasun eztien eta garraiobide alternatiboen defendatzaile guziei, itzulbiderik gabeko klima-nahasmendua errefusatzen dutenei, Donibane Lohizuneko Verdun-eko plazabaratzetik 15:00etan abiatuko den ibilaldian parte hartzera irailaren 25ean, igandez, gogo alai eta aldarrikatzaile batekin..
Aldaketa hasi da mundu osoan.
Donibane Lohizunetik ere iragan behar da!
