Ipar Euskal Herriaren Metamorfosi Ekologikoaren Ituna izenpetu duten 80 zerrendak

Astelehen honetan, martxoaren 9an, 3 hilabete pasa iraun duen mobilizazio baten ondoren eta aste batez Ipar Euskal Herria zeharkatuz euri eta harri pean iragan den Martxa eta gero, Bizi! elkarteak Ipar Euskal Herrian, lurraldearen metamorfosi ekologikoaren Ituna izenpetu duten 80 zerrenda zenbatzen ditu.

Ituna izenpetu duten zerrendek, 48 herri eta Euskal Hirigune Elkargoko biztanleen %83a ordezkatzen dituzte. Handitasun guzietako herriak eta sentsibilitate guzietako taldeak (herritarrak eta tendentzia politiko guzietakoak) ordezkatuak izanen dira martxoaren 15 eta 22ko hauteskundeetan, Ipar Euskal Herrian.

Zerrenda horiek (ikus hemen: https://bizimugi.eu/eu/2020ko-ituna-izenpetu-duten-zerrendak edo beherean) engaiatzen dira oraindanik eta beren kargualdi osoan, herriko etxe mailan edo elkargo mailan ukanen dituzten ardura eta baliabideak lagun, 7 tematiketan ekiterat: mugikortasun aktibo eta garraio kolektiboetan, egoitzen energia menperatzean, energia berriztagarrietan, hondakinen murrizketan eta ekonomia zirkularrean, elikadura biologikoan eta tokikoan, eta laborantzarentzat onak diren lur eremuen babestean, ekonomiaren birtokiratzean Euskoa den tokiko moneta ekologiko eta solidarioa babestuz, eta Klima Planaren herriko deklinazioaren bidez.

Ainitz zerrendek adierazi dute larrialdi ekologikoaren konzientzia hartzea Ituna izenpetuz.

Bereziki 1000 biztanletik behiti diren 17 herritan, non baliabide gutti diren, baina bertako zerrendak engaiatu dira Elkargoaren baitan eraldaketa ekologikoaren politiken sustatzerat. Arrunt alderantziz, herri handiago batzutako zerrenda batzuk ez dute Ituna izenpetu (Ikus beherean). Hara nola Claude Olive BABn kargutan zen auzapez bakarra da lurraldearen egiazko metamorfosi ekologiko baten alde engaiatzerat errefusatu duena.

Bizi!k deitzen ditu hautesleak, beren martxoaren 15 eta 22ko boz emaitea aintzin, beren hautuko zerrendak ea Metamorfosi Ekologikoaren Ituna izenpetu duen so egiterat, horren bidez herriak eta Elkargoa engaiatuak izanen dira beren rol nagusia betetzeko aldaketa klimatikoaren kontra eta energia fosilekiko dugun dependentziaren ttipitzean, bai eta ekologikoki eta sozialki zuzenago eta jasangarriago izanen den jendarte baten alde.

Hauteskundeetarik landa, engaimenduen jarraipen batzorde batek egiaztatuko du eta jarraituko du 7 engaiamendu horien gauzatzea izenpetzaile den Herriko Etxe bakoitzean bai eta ere Euskal Elkargo mailan, heldu den kargualdiaren denbora osoan. Elkarteak ere bereziki segituko ditu Ituna izenpetu ez duten herriak, azkartzen eta zalutzen ari den nahasmendu klimatikoan duten arduraren heinean.

Larunbatean, martxoaren 14an, Bizi berriz mobilizatuko da klimarentzat txirrindulazko manifestaldi berri bat antolatuz. Hitzordua emana da goizeko 11:00etan Angeluko Herriko Etxe aitzinean. Klimaren aldeko Txirrindiraultza hau BAB Etorbideraino joanen da Butte-aux-Cailles-eko biribilgunean piknika handi batekin bukatzeko. Molde horretan biribilgunea okupatuko dugu besta eta aldarrikapen giroan, BAB etorbidean eta beste eremu guzietan ere, bizikleta bide babestuen aldarrikatzeko!