Bizik dei adarra jotzen du Mugerreko azken hezeguneetako 12 hektarea berehalako suntsitze arriskuan direla jakinarazteko. Proiektu horrek bioaniztasuna eta ur erreserbak mehatxatzen ditu, gertakari klimatikoei buru egiteko gure erresilientzia bideak ahultzen eta balio handiko hezeguneak artifizializatzen, zero artifizializazio garbirantz doan logikaren kontra joanez. Bizi! juntatzen da Mouguerre Cadre de vie elkarteari eta CADE Ingurumen Defentsarako Elkarteen Kolektiboari Mugerreko hezeguneen babestea galdatzeko, aitzinikusten zaien artifizializazioaren kontra, eta horretarako petizioa izenpetzeko deia luzatzen du.
Bizik deiadarra jotzen du gaur Mugerreko azken hezeguneetan Europako Merkantzia Zentroaren 12ha-ko zabaltze proiektuaz, Irlanda eta Espainia lotuko dituen trenbidezko autobidearen sortzea prestatzeko (kasik 10 ha) eta mediku material salmenta eginen duen Enovis (lehenago DJO) enpresa 3 ha-tan finkatzeko. Mugerreko azken 12 hezegune hektareak 2 m-ko goratasunean estaliko lirateke.
Mugerreko hezeguneak babesteko 6 arrazoi
Uholde arriskua handituko da. Euri-ura atxikitzen duten hezegune hauen desagertzearekin eta lurraren goratzearekin, Aturri ibaiaren uholdeen karietara ura beherago hedatuko da eta barreiatuko Mugerreko Portuko, Lehuntzeko edota Baionako bizitegietara. Mouguerre Cadre de vie-ren arabera, “Aurkezturiko dosierrak zinikoki aurreikusten du ur-mailaren 10 zm-ko igoera ibaiertzeko etxeetan“. Uholdeetatik harago, hezeguneek funtzio handia dute ur-maila apalak eta ur geza biltegiak erregulatzeko.
Klima-erronkaren kontra hola ari izanez, CO2 gehiago xurgatuko ez luketen eta klima-aldaketa arintzen lagunduko ez luketen beste hainbeste hektarea dira, gradu zati bakoitzak haren inpaktuak mugatzeko balio duen bitartean.
Mugerreko hezeguneen suntsitzea gure segurtasun klimatikorako sareen ahultzea da, amildegiaren hegian gaudelarik. Ekosistema horiek gure erresilientzia bermatzen dute, hau da, idorteen edo uholdeen eraginak mugatzeko gaitasuna. Gogora dezagun 2023. urtea +1,48 ºC-ra iritsi dela mundu mailan, eta klima-desorekaren ondorioz muturreko klima-gertakariak anitzagoak eta biziagoak direla.
Artifizializazioaren murrizketa zorrotzaren orduan hautu ulertezina da. Frantziako Estatuak, 2021eko agorrilean onartutako Klima eta erresilientzia legearen baitan, 2050ean “lurraren zero artifizializazio garbia” (ZAN delakoa) lortzeko helburua finkatu zuen, ondoko hamar urteetan (2021-2031) naturaguneen, laborantzaren eta oihangintzaren kontsumoa erdira murrizteko bitarteko helburuarekin, aitzineko hamarkadarekin (2011-2021) alderaturik. Hektarea bakoitza kontuan hartzen denean eta Euskal Herriko biztanleendako lehentasunezko erabilerendako erabilia izan behar den unean, lurralde barnean orekak pisatu behar direlarik bidezko garapen batendako, nola justifika daiteke Mugerreko hezeguneen suntsitzea?
Gero eta kamioi gehiago bideetan. Bestalde, trenbidearen tirria ttipitua da Espainiara doan trenbide hori Mugerren gelditzen dela jakiten denean. Beraz, kamioi guziek A63 errepidea hartuko dute Mugerretik mugaraino, eta alderantziz. Horren ondorioz, desoreka klimatikoaren erantzule den berotegi efektuko gasen isurketaren emendatzea eta autobidean trafiko handiagoa.
Bioaniztasuna mehatxatua dela diote. Hezeguneek bizileku onuragarria eskaintzen diete desagertzeko zorian diren espezie anitzi. Horra CPIE-k ekosistema oso berezi hortaz egiten digun aurkezpena.
Lurraldea zaintzeko mobilizatu!
Hezeguneen artifizializatzearen hautua ulertezina da. Bereziki, jakinez beste aterabide batzuk badirela egitura haien instalatzeko, lurraldea zainduz.
Mugerre herriari eta EHE-ri proposatu zaizkien alternatibekin bat egiten dugu. Lehenik, Enovis (lehengo DJO) beste gune batean instalatzearen proposamenarekin, adibidez, ondoan den Salines-etako lugorri industrialen tokian. Bestalde, trenbideendako lurreztatze lanak berantagoko atxikitzea, jada lurreztatua den Europako Merkantzia Zentroaren gunean has daitezkelako.
Eskaera honen izenpetzea eta berri hauen zabaltzea galdetzen dizuegu. Alabaina, proiektu honi baimena laster eman liezaiokete, eta ondotik 12 hektareen lurreztatze lanak segidan hasiko lirateke.
